Rekebord på Knutholmen

Gjennom mannen sin arbeidsplass har vi høve til å leige ei bu i Kalvåg til ein rimeleg penge. Vi har vore her dei siste tre åra, og eit av høgdepunkta er rekebordet ved Knutholmen. I år er eldstejenta med på turen, såleis hadde vi barnevakt, så vi vaksne kunne gå åleine å ete.



Som alltid var maten og omgjevnadene heilt fantastisk, så dette kan anbefalast!

Fisketur til Instevatnet

I dalen eit godt stykke innanfor hytta vår, ligg eit mindre vatn med ganske mykje fisk. I fjor var vi der, då var fiskane veldig små. I år var dei eit hakk større, og mange i talet. Trur vi fekk oppimot 40 stykker totalt. Jentene tykte det var stas med så mykje fisk, dei fekk sveive inn og ta på land mange fiskar kvar. Dei fekk òg handtere sprellande fisk og tåle litt fiskeblod.



Kristina var så heldig å få sveive inn ein av dei største fiskane, her ser de korleis det foregjekk...



Endeleg fekk vi mykje fisk når ungane var med, det var stas...

Garnhandel

Som nemnt har vi vore på tur igjen. Før vi reiste avgarde, laga eg eit innlegg på hobbyboden ang. tips til garnbutikkar eg burde besøke. Fekk tips om fleire, men det passa slik at eg fekk ein tur innom Morgrethe i Brumundal. Ein veldig fin butikk der alt var ryddig og ordentleg. I tillegg var der sjølvsagt mykje flott.

Kjøpte med meg dette:



Ein annan butikk eg kom meg innom var Husfliden på Lillehammer. Her var det òg mykje flott. Her vart det handla ein del Inka, og eit par nøster med Online sokkegarn.


Dette garnet har eg litt planar med, må sjå litt i "Myk start" om der er nokre fine oppskrifter til små mjuke babyplagg...



Sokkegarn er det alltid kjekt å ha liggande... Greit å ha eit lite lager av godsaker liggande til haustkveldane kjem.

Ny ferietur

Vi har jo allereide vore på ein ferietur til Sverige. Vi har imidlertid ein 11-åring som likar godt å reise på tur, så etter press frå henne vart det ein tur til. Denne gongen har vi leigd hytte på Steinvik camping i Moelv. Så har vi farta litt rundt her i distriktet, på ungane sine premissar. Det vil seie badeland, leikeland m.m. I skrivande stund er vi på leikeland, her er det til og med gratis internett. Eg har tilogmed fått meg ein tur på ein garnbutikk, skal heller lage eit innlegg om det når eg kjem heim.

Her kjem nokre bilete av gullungane....







Og her er min dessert ein av dagane...


Dette er siste dagen, i morgon reiser vi heimom eit par dagar før neste tur.

Bakedag

Sidan vi skal på tur i morgon, har eg brukt dagen til å bake og vaske kle. Av bakst er det blitt pizzabollar, pizza, fletteloff, kanel- og vaniljebollar og rosinbollar.



Litt til niste til i morgon, og ein del til frysaren. Kjekt å ha.

Misslykka vottar

Ja ja, då er vottane tova. Det gjekk forsåvidt greit, to omgangar på 60 grader. Dei vart nokså små, men kan strekkast litt i fasong. Men TOMMELEN vart STOR. Får sjå om det i det heile tatt går an å bruke desse vottane.





Ja ja, betre lukke neste gong, men irriterande å bruke så mykje tid på noko som ikkje vart bra.

Strikkelysta er på veg tilbake...

For eit par månader sidan uttrykte eine bror min ynskje om eit par tova vottar, til bruk under vindvottar. Dette var noko eg hadde tenkt på å prøve meg på, så no fekk eg ein god grunn til å prøve meg.



Eg fann oppskrift i eit Idena-hefte som eg fekk med svigermor, men brukte anna garn med omlag samme strikkefastheit. (Østlandsgarn). Vottane vart veldig store, så eg håpar dei tovar seg godt.

I skrivande stund er vottane i vaskemaskin, eg tok sjansen på 60 grader sidan dei var så store. Blir spennande å sjå resultatet.

Hyttetur...

Ferien har starta med dårleg veir. Vi hadde planlagt å vere litt på hytta i ferien, men i slikt veir er det ikkje alltid like kjekt. Når regnet ausar ned og skodda ligg tung ned til vatnet, er det begrensa kor lenge vi er der.

Måtte ut å lufte meg i går, men ingen fiskar beit. Eit par bilete frå mobilkameraet.





Hytta vår er utan straum og innlagt vatn. Det eg sakna mest med det, var sjølvsagt å ikkje få dusje når vi var der i fleire dagar. Men no har vi funne ei innretning som fungerer; to gamle badekar som vi fyrer under. Vatn får vi i slange frå ei elv. Når kvelden kjem og vi har fyrt oppunder nokre timar, er det fantastisk å legge seg opp i karet og nyte...


Vi har bygt hytte på ei moltemyr...


Kjørdalselva

Feriesyslar...

No har vi tre veker ferie framfor oss, og det er berre å begynne å nyte det. Veiret er ikkje av det beste her vestpå, men vi får gjere det beste ut av det. Denne helga har blitt brukt til å passe ungane til nokre bryllaupsgjester, og elles til forefallande arbeid her heime. (Les: husarbeid.) Litt avslapping innimellom har det òg blitt.

Vi har bestemt oss for at frysarane våre er fulle nok no, så vi må begynne å ete opp litt. Dagens middag vart difor grillbein med tilbehør.


Eg jobbar med å finne tilbake strikkelysta, no når vi har ferie må eg no benytte meg av at eg har god tid. På den vesle ferieturen som vi hadde for eit par veker sidan begynte eg på dette babyteppet. Greit å ha noko rett-fram-strikk der ein slepp å tenkje. Målet no er å få ferdig dette innan rimeleg tid...



Tjukke pinnar og babyull, kun rettstrikk, kan det bli enklare? Planen er å hekle ein kant rundt når det er ferdig.



Tvillingane våre...

Då dei kom til verda var vi alle sikre på at dei var toegga, sjølv om dei var nokså like ved fødselen. Toegga tvillingar er arveleg, og sidan eg har brødre som er tvillingar, og elles ein god del tvillingpar i slekta, måtte jo dette vere arven som slo til. Etter kvart begynte vi å lure litt, vi måtte kle av dei for å sjå på fødselsmerka kven som var kven. Då dei vart større voks dei seg meir og meir ulike, og folk flest som kjenner dei har ikkje problem med å sjå forskjel på dei.
I går tok eg dette biletet av dei medan dei så på Tv. Eitt eller to egg???




Ha ein fortsatt fin kveld!

Lite aktivitet her...

...Vi har vore på tur...

Det er ferietid, sjølv om eg jobbar litt denne veka òg. Forrige veke hadde vi fri, så då var gubben, småjentene og eg på ein ferietur. Sonen vår er i Sveits i lag med bestemora og kusina si, og eldstejenta har vore heime og jobba. Fyrst gjekk turen til Østfold der vi handla ny bil, derifrå køyrde vi med to bilar til Sunne i Sverige. Vi hadde høyrt mykje fint om denne plassen, så dette måtte vi prøve. Overnattinga vår foregjekk i telt, og så lenge veiret er fint er det supert. Sidan vi har Caravelle får vi med oss madrasser og dyner òg, det gjer jo comforten litt betre.

Medan vi endå var i Noreg var vi innom Fredriksten festning der dei spelar inn "Allsang på grensen." Det var ikkje innspeling då vi var der, men dei øvde, så vi fekk no sjå eit par kjendisar. I Sverige vart det bading både innandørs og utandørs, leik på leikeplassen, besøk i ein park og latmannsliv. I tillegg måtte vi jo prøve nokre restaurantar. Sidan vi stort sett var heldige med veiret, hadde vi ein roleg og flott tur. Sunne kan absolutt anbefalast som ferieplass med familiar!



Sidan dette i utgangspunktet var ein hobbyblogg, kan eg no nemne litt om korleis det går på hobbyfronten. Eg har for tida 4 strikketøy liggande, to på hytta og to heime. Inspirasjonen manglar, så det går TREIGT. Dei som ventar på nye strikkeoppdateringar må nok vente ei stund, er eg redd. Får prøve å kome i gang igjen litt no når eg begynner på 3 samanhengande ferieveker kl 15.45 i morgon.